2021 වසරේ දී අගෝස්තු මාසයේදී ඇෆ්ගනිස්තානයේ පාලනය තලේබාන් සංවිධානය යටතට ගැනීමත් සමග එරටින් පලාගිය ක්‍රිකට් ක්‍රීඩිකාවන් පිරිසක් මේ වනවිට ඔස්ට්‍රේලියාවේදී එක්වී ක්‍රිකට් කණ්ඩායමක් ද පිහිටුවාගෙන තිබේ.

එම කණ්ඩායම පළමුවරට මෙල්බන්හි පෙරේදා (29) පැවති ක්‍රිකට් තරගයකට ද ක්‍රීඩාකර ඇත.

Cricket Without Borders XI කණ්ඩායම සමගින් ඔවුන් මෙම තරගය ක්‍රීඩා කර ඇති අතර, මෙය ආධාර එක්රැස් කිරීමේ පුණ්‍ය තරගයක් ලෙසින් පවත්වා තිබේ.

මෙම තරගය ක්‍රීඩාකිරීමෙන් පසු Afghanistan Women’s XI කණ්ඩායමේ නායිකා නහිඩා සැපන් පවසා ඇත්තේ, අධ්‍යාපනය සහ ක්‍රීඩාව ඇෆ්ගනිස්තා කාන්තාවන්ට විවෘත කිරීමට මෙම තරගය පණිවුඩයක් වනුඇති බවයි.

ඇෆ්ගනිස්තානයේ පාලනය තලේබාන් සංවිධානය විසින් අත්පත්කර ගැනීමත් සමග එරට කාන්තාවන්ට නිර්දය ලෙස දැඩි සීමා පැනවීය.

එහිදී කාන්තාවන්ට ක්‍රීඩාව සහ අධ්‍යාපනය තහනම් කළේය.

මේ හේතුවෙන් සිය ගණන් ඇෆ්ගනිස්තාන කාන්තා ක්‍රීඩිකාවන් ලොව විවිධ රටවලට පලා ගියේය.

ඒ අනුව වසර තුනකට පෙර ඇෆ්ගනිස්තානයෙන් පලා ආ මෙම ක්‍රිකට් ක්‍රීඩිකාවන් ඔවුන්ගේ පළමු තරගයට මෙලෙස ක්‍රීඩා කර ඇත.

මේ වනවිට ඇෆ්ගනිස්තාන කාන්තා ක්‍රිකට් කණ්ඩායම නියෝජනය කළ බොහෝ දෙනෙක් ඔස්ට්‍රේලියාවේ සරණාගතයින් ලෙස පදිංචිව සිටියි.

Copied