ශ්‍රී ලංකාවේ සමස්ත ජනගහනයෙන් 10%ක් පමණ වකුගඩු රෝගයෙන් පීඩා විඳින බවට ඇස්තමේන්තු කර ඇති බව ප්‍රජා වෛද්‍ය විශේෂඥ චම්පිකා වික්‍රමසිංහ මහත්මිය අනාවරණය කළා.

පසුගිය දිනක සෞඛ්‍ය ප්‍රවර්ධන කාර්යාංශයේ පැවති මාධ්‍ය හමුවකට එක්වෙමින් ඇය කියා සිටියේ වකුගඩු රෝගය හේතුවෙන් දිනකට පුද්ගලයින් 4ක් හෝ 5ක් මිය යන අතර වාර්ෂිකව අලුතින් රෝගීන් 5,000ක් පමණ හඳුනා ගන්නා බවයි.

පසුගිය මාර්තු 12 වන දිනට යෙදුණු ලෝක වකුගඩු දිනය වෙනුවෙන් සෞඛ්‍ය අමාත්‍යාංශය විසින් විශේෂ චක්‍රලේඛයක් නිකුත් කර ඇති අතර, ඒ අනුව, දියවැඩියාව සහ අධික රුධිර පීඩනයෙන් පෙළෙන සියලුම පුද්ගලයින් අවම වශයෙන් වසරකට වරක්වත් වකුගඩු ක්‍රියාකාරීත්වය පිළිබඳ පරීක්ෂණයකට (Kidney Health Check-up) භාජනය විය යුතුයි.

මෙම රෝගාබාධ සහිත පුද්ගලයින් වකුගඩු රෝගයට ගොදුරුවීමේ දැඩි අවදානමක් ඇති බැවින් රෝගය කල්තියා හඳුනා ගැනීම මෙහි අරමුණයි.

දැනට දිවයින පුරා අවසාන අදියරේ වකුගඩු රෝගයෙන් (End-stage kidney disease) පෙළෙන රෝගීන් 20,000ක් පමණ සිටින බවත්, ඔවුන්ට අවශ්‍ය ප්‍රතිකාර ලබා දීමේදී පවතින අභියෝග පිළිබඳවත් ඇය කරුණු පැහැදිලි කළා.

වාර්ෂිකව රුධිර කාන්දුකරණ (Hemodialysis) ප්‍රතිකාර ලබා දිය හැක්කේ රෝගීන් 5,000කට පමණි.

වසරකට වකුගඩු බද්ධ කිරීමේ සැත්කම් සිදු කෙරෙන්නේ 300ක් වැනි සීමිත සංඛ්‍යාවක්.

හඳුනා නොගත් වකුගඩු රෝගීන් සොයා ගැනීම සඳහා දිවයින පුරා විශේෂ පරීක්ෂණ මධ්‍යස්ථාන පිහිටුවීමට සෞඛ්‍ය අමාත්‍යාංශය පියවර ගනිමින් සිටියා.

පොදු ජනතාව මෙන්ම සෞඛ්‍ය කාර්ය මණ්ඩල ද වකුගඩු රෝග නිවාරණය පිළිබඳව දැනුවත් කිරීමේ වැඩසටහන් දැනටමත් ප්‍රධාන රෝහල් ආශ්‍රිතව ආරම්භ කර ඇති බව අතිරේක ලේකම්වරිය වැඩිදුරටත් අවධාරණය කළා.