රට තුළ ලුණු හිඟයක් ඇතිවෙතැයි අනිසි බියක් ඇතිකර නොගන්නා ලෙස ලුණු නිෂ්පාදකයින්ගේ සංගමය ජනතාවගෙන් ඉල්ලා සිටියි.

ඔවුන් පවසන්නේ දේශීය වෙළෙඳපොළ තුළ අවශ්‍ය තරම් ලුණු මිලදී ගැනීමට තිබෙන බවයි.

රට තුළ උද්ගත වියහැකි ලුණු හිඟයට පිළියමක් ලෙස ලුණු මෙට්‍රික් ටොන් 30,000ක් ආනයනය කිරීම සඳහා කැබිනට් අනුමැතිය මේ වනවිට හිමිව තිබේ.

ලුණු නිෂ්පාදකයින්ගේ සංගමය පවසන්නේ සාමාන්‍ය පරිභෝජනය සඳහා මෙලෙස ශ්‍රී ලංකාවට ලුණු ආනයනය කෙරෙන්නේ වසර 15කට පමණ පසුව බවයි.

මෙරට ජනතාවගේ ලුණු අවශ්‍යතාව සම්පූර්ණ කිරීම සඳහා ලුණු නිෂ්පාදනය කෙරෙන්නේ හම්බන්තොට, පුත්තලම, මන්නාරම, අලිමංකඩ සහ ත්‍රිකුණාමලය ආදී ප්‍රදේශවල පිහිටි ලුණු ලේවායන්වලින්ය.

ඒ අනුව මෙරට වාර්ෂික ලුණු අවශ්‍යතාව මෙට්‍රික් ටොන් 180,000ක්.

ඉන් 50%ක් රාජ්‍ය අංශයෙන් ද 50% ක් පෞද්ගලික අංශයෙන්ද නිෂ්පාදනය කෙරේ.

නමුත් මේ වසරේ ලුණු නිෂ්පාදනය මෙට්‍රික් ටොන් 200,000ක් ලෙස අපේක්ෂා කළද මේ වනවිට සැලකිය යුතු ලෙස ලුණු නිෂ්පාදනය පහත බැස තිබේ.

ඊට ප්‍රධාන හේතුවක් වී ඇත්තේ 70%ක පමණ ලුණු නිෂ්පාදනයක් සිදුකෙරෙන ජුලි සහ ඔක්තෝබර් අතර මහ කන්නය පුරා වර්ෂා සහිත අයහපත් කාලගුණයක් පැවතීමයි.

ඉන් ලුණු නිෂ්පාදනයට අහිතකර බලපෑමක් එල්ල වී ඇත.
මේ හේතුවෙන් අපේක්ෂිත ලුණු නිෂ්පාදනය සම්පූර්ණ කරගැනීමට නොහැකි තත්ත්වයක් මේ වනවිට උද්ගතවී තිබේ.

එනිසා යම් අයුරකින් ලුණු හිඟයක් උද්ගත වුවහොත් ඊට පිළියමක් ලෙස අයඩීකරණය නොකළ ලුණු මෙට්‍රික්ටොන් 30,000ක් ආනයනය කිරීමට රජය තීරණය කර ඇත.

උපුටා ගැනීම අන්තර්ජාලයෙන්…