රුසියාවේ හිටපු ජනපති දිමිත්‍රි මෙඩල්ඩෙව් අද දින සුවිශේෂී ප්‍රකාශයක් කරමින් කියා සිටියේ ඉරානය න්‍යෂ්ටික අවියක් හැදිය යුතු නෑ. රටවල් කිහිපයක්ම ඉරානයට න්‍යෂ්ටික අවි ලබාදීමට සූදානමින් සිටින බවයි.
මේ යුද්ධය ඉක්මනින් අවසන් කිරීමට නම් ඉරානය කළ යුත්තේ එක්කෝ තමන් සතු 60 % හෝ 85% ට බලගැන්වූ යුරේනියම් යොදා වහාම න්‍යෂ්ටික අවියක් තැනීමය. එසේ නැතිනම් තම මිතුරු රටවල් හරහා එම න්‍යෂ්ටික බලය සියතට ගෙන ඇමරිකාවට සහ ඊශ්‍රායෙලයට පෙන්වීමය. උතුරු කොරියාව මෙන්ම පකිස්ථානයද ලෝක බලවතුන්ගේ යකඩ සපත්තුවට නොපෑගි හිස කෙලින් තබාගෙන සිටින්නේ තමන් සතුව න්‍යෂ්ටික යුධ හිස් තිබෙන නිසාය. උතුරු කොරියාවට ට්‍රම්ප් ගේ පළමු ධූර කාලයේදී වරින්වර චංඩිකම් පාන්නට විය. උතුරු කොරියාව එයට පිළිතුරු දුන්නේ කි.මී. 10000 ක් ගමන් කරන අන්තර් මහද්වීපික බැලැස්ටික් මිසයිලයක් (ICBM )සාර්ථකව අත්හදා බැලීමෙනි. එම මිසයිලය උතුරු කොරියාවේ සිට ඇමරිකාවේ ඕනෑම තැනකට පහරදිය හැකි මට්ටමකින් නිමවා තිබුණි. ඉන් පසුව ඩොනල්ඩ් ට්‍රම්ප් උතුරු කොරියානු නායකයා සිංගප්පූරුවේදි හමුවී බොහෝ කුළුපගව කතාකර කාරණා කටයුතු පිළියෙල කරගත්තේය. උතුරු කොරියාව සතුව න්‍යෂ්ටික අවි මෙන්ම ඒවා රැගෙන යන අන්තර් මහද්වීපික මිසයිලද ඇත. පසුගිය සමයේ උතුරු කොරියාව පුටින්ගේ සහයට තම සෙබළුන් 15000 ක් යුක්‍රේනයට පිටත් කර යවන විට ඇමරිකාව ඇටි කෙහෙල් කෑ උගුඩුවෙකු සේ බලා සිටියා මිසක ප්‍රශ්ණ කරන්නට ආවේ නැත. ඒ තමයි න්‍යෂ්ටික අවියේ බලය. මේ සියළු තත්වයන් සැලකිල්ලට ගෙන ඉරානය මේ මොහොතේ කෙසේ හෝ න්‍යෂ්ටික අවියක් තැනිය යුතුමය.
ඉරානයේ භූගත න්‍යෂ්ටික බලාගාර දෙකක් යැයි අනුමාන කර ඇමරිකාව අති දැවැන්ත බන්කර් නාශක බෝම්බ 6 ක් හෙළුවේය. එක් බෝම්බයකට විනාශ කළ හැකි ගැඹුර මීටර් 60 කි. මෙම බෝම්බ හයම පතිත කර ඇත්තේ ස්ථාන 6 කටය. මෙම ප්‍රහාර වලින් ඉරාන න්‍යෂ්ටික මධ්‍යස්ථාන විනාශ නොවූ බව නෙතන්යාහු පවා පැවසුවේය. 2025 ජුනි මස දින 12 යුද්ධයේදී මෙම න්‍යෂ්ටික මධ්‍යස්ථාන අසල ට්‍රක් රථ ගණනාවක් නතර කර තිබූ චන්ද්‍රිනා චායාරූප මුදාහැර තිබුණි. මෙම ස්ථාන වලට පහර දෙන බව රුසියානු ඔත්තු සේවා දින ගණනාවකට පෙර ඉරානයට දන්වා තිබූ බව වාර්තා විය. ඉරානය විසින් බලගැන්වූ කිලෝ 400/500 පමණ යුරේනියම් තොගය කිසිවෙකුට හසු නොවන තැනක සඟවා හෝ රුසියාවට මේ වනවිට ලබාදී ඇත. හිටපු රුසියානු ජනපති හා වර්ථමාන රුසියානු ආරක්ෂක මංඩල ප්‍රධානි පවසන්නේ තවත් රටකින් ඉරානයට න්‍යෂ්ටික අවියක් ලැබෙන බවය. එසේ නම් එය ඉරානයේ බලගැන්වූ යුරේනියම් නැවත ඉරානයටම ලැබීමක්ද ?